Pegatina batekin identifikatuta egongo dira, behar duen edozein gaztek jakin dezan haiengana jo dezakeela dei bat egiteko eta, horrela, gailu horien beharrik gabeko erabilera saihesteko
Donostiako Udalak, Altxa Burua Donostia plataforma osatzen duten guraso taldearekin lankidetzan, gaztetxoen artean telefono mugikorren eta teknologia berrien erabilera arduratsua sustatzen jarraitzeko kanpaina bat bultzatu du. ‘Gurea erabil dezakezu’ lelopean, ekimenak hiriko eraikin publikoetan eta dendetan dauden telefonoetatik deiak egiteko aukera eman nahi die gazteei.
Iñigo García Hezkuntza eta Osasun Publikoko zinegotziak adierazi duenez, «gizarte ekimen honek adingabeen hezkuntza digitalean partekatutako erantzukizuna ikusarazteaz gain, gure komunitatea ere indartzen du, belaunaldien arteko elkartasun-sareak sortuz».
Altxa Burua Donostia hiriko 30 ikastetxetako (Lanbide Heziketa, HH, LH, DBH eta Batxilergoa) guraso-taldeek osatutako gizarte-mugimendua da, eta haurrak gero eta goizago beren smartphone-etara sartzeko kezka partekatutik sortu zen. Bi helburu nagusi ditu:
• Lehen gailu mugikorraren edukitzea ahalik eta gehien atzeratzea.
• Telefono mugikorren, sare sozialen eta teknologia berrien erabilera egokia bideratzea.
2016tik martxan
2016az geroztik, Udala ikastetxeetan osasun digitalaren inguruko proiektu bat garatzen ari da, teknologiak herritarren ongizatean duen inpaktuak planteatzen dituen erronkei heltzeko helburuarekin. Altxa Burua Donostiaren lana ildo horren barruan kokatzen da, udalak ingurune digital osasungarriak sustatzeko duen konpromisoa indartuz.
Hilabeteetako hitzaldien ondoren, Altxa Buruak Udalaren laguntza eskatu zuen pauso bat harago emateko: adingabeak gailu mugikorren menpe ez egotea eta beste baliabide batzuk izatea, norbaiti deitu behar badiote.
Ideia horretatik sortu da ‘Gurea erabil dezakezu’ ekimena. 450 saltoki inguruk bat egin dute ekimenarekin, erakusleihoan pegatina bereizgarri batekin identifikatuta, eta behar duen edozein gazteri doako dei hori behar duenean eskatzeko eta erabiltzeko aukera ematen dio, mugikorraren erabileraren beharra saihestuz. Udaleko edozein kultur etxe edo kirol instalaziotatik ere egin ahal izango dute.
Komunitatea egitea
Udalak oso positibotzat jo du ekimen hau, teknologia berriekiko balizko adikzioen prebentzioan eragin zuzena duelako eta gure auzoetako gizarte-kohesioa indartzen duelako.
Kanpainak, gainera, ikastetxeetako tailerrak, familientzako hitzaldiak, eduki digitalak, espazio publikoetako kartelak eta ongizate digitalari, pantaila-denboraren kudeaketari eta aisialdi osasungarriari buruzko baliabideak dituzten gazte-informazioko puntuak gaitzea biltzen ditu.
García Villanuevak esan duenez, «hazten ari direnak zaintzea Donostia zaintzea da. Altxa Burua begirada altxatzeko deia da, axola duenarekin berriz konektatzeko, eta guztion artean hiri gizatiarragoa, atseginagoa eta askeagoa eraikitzeko.
