Enkarterrin egin da gaur Basque Segurtasun Foroaren lehen topaketa
Basque Segurtasun Foroak, Euskadiko Segurtasun Integralaren kontzeptuari buruzko hausnarketa estrategikoaren prozesuak, bere lehen topaketa egin du gaur Sodupeko (Güeñes) kultur etxean. Eusko Jaurlaritzako Segurtasun Saila buru duen foro honek beharrezko eragile guztien inplikazioa bilatzen du Euskadiko Segurtasun Integralari buruz eta euskal gizarteak hainbat arlotan aurre egin beharko dien erronkei buruzko diagnostiko partekatu bat lortzeko, hala nola herritarren segurtasunean, zibersegurtasunean, autobabesean, larrialdi klimatikoetan edo enpresen segurtasunean. Hala, gaur arratsaldean Sodupen egindako lehen bilerara, besteak beste, Enkarterriko eta Bizkaiko Ertzaintzako arduradunak, eskualdeko alkateak, zinegotziak, udaltzainak, eskualdeko enpresak, babes zibileko arduradunak, hainbat arlotako gizarte-agenteak… hurbildu dira.
Bilera hasi aurretik, Bingen Zupiria Segurtasuneko sailburuak adierazi du segurtasuna «zerbitzu publikoa» dela, eta «segurtasunaren arduradun garen aldetik, gizarteari entzun behar diogu eta jakin behar dugu zer espero duten horrelako zerbitzu publiko batetik. Gizartea egungo eta etorkizuneko segurtasunari buruz dituen kezketako batzuk adierazten ari da. Delituengatik kezka dago, pertsona guztien osotasun fisikoagatik, batez ere emakumeena, zibersegurtasunagatik… Gizarte honi eta beste batzuei eragiten dieten fenomeno meteorologikoengatik ere kezka dago. Kontua da gizarteari entzutea eta ikustea nola hobetu dezakegun erakundeetatik ematen ari garen erantzuna gure gizartean gertatzen ari diren horrelako fenomenoen aurrean».
Gainera, Segurtasuneko sailburuak adierazi duenez, «herritarrak kalera irtetean babestuta eta seguru sentitzeko eskatzen ari zaizkigu, fenomeno bortitzen aurrean ere babestuta eta seguru sentitu nahi dutela. Eta herritarrek esaten digute erakundeen arteko lankidetza estutu behar dugula Eusko Jaurlaritzaren, foru-aldundien eta udalen artean, bai eta erakunde horien mende dauden agenteen artean ere, hala nola Ertzaintza, udaltzainak, suhiltzaileak eta gure Herrian ditugun boluntarioen taldeak, sozietateak, erakundeak, enpresa-sektorea, hezkuntza-sektorea… «. Eskaera horri erantzun behar zaiola azpimarratu du Zupiriak, «erakunde horien arteko lankidetza harremana estutuz. Hori da, batez ere, gaurtik aurrera Euskadiko eskualde guztietan egingo ditugun topaketa hauen helburua, harreman zuzena bilatuko baitugu gizartearen ordezkariekin «.
Enkarterri
Basque Segurtasun Foroaren lehen topaketaren hasieran Bingen Zupiria Segurtasuneko sailburuak eta Ager Izagirre Herri Administrazio eta Erakunde Harremanetarako foru diputatuak aurkezpen txiki bat egin dute, eta, horren ostean, dinamika parte-hartzaileari ekin diote. Dinamika horrek balio izan du parte-hartzaileek, besteak beste, segurtasun kolektiboaren, segurtasun pertsonalaren, lurraldearen edo eskualdearen segurtasunaren edo zibersegurtasunaren arloetan identifikatzen dituzten erronkak zuzenean ezagutzeko.
Sodupeko topaketa Eusko Jaurlaritzako Segurtasun Sailak gidatutako 31 topaketetako lehena izan da, eta hiru lurralde historikoetan eta ertzain-etxeak dauden 24 eskualdeetan egingo dira. Basque Segurtasun Foroaren topaketa hauek Eusko Jaurlaritzako Segurtasun Saila lantzen ari den 2026-2030 Segurtasun Integraleko Plana garatzeko diagnosi-tresna izango dira.
