Lanak egiteko epea sei hilabetekoa da, eta aurrekontua 125.000 eurokoa.
Mugikortasun Jasangarriaren sailak, Euskal Trenbide Sarea erakunde publikoaren bitartez, Bilboko trenbide metropolitarraren 4. linearen eta hegoaldeko eremuaren informazio-azterlanaren eguneraketa esleitu du bere kontratazio-organoaren azken bileran.
Fulcrum ingeniaritza-enpresak egingo dituen lanek 125.000 euroko aurrekontua eta sei hilabeteko egikaritze-epea dute, eta helburua Moyuan 4. linea gainerako sarearekin lotzeko eta trazadura Matikon amaitzeko trazaduran aldaketa bat sartzea da.
Hasierako informazio-azterlanean Basurtu-Abando trazadura jasotzen zen. Bertan zegoen aurreikusita 4. linea Bilboko metroaren sarearekin lotzea. Trazadura aldaketa, abiadura handia Bizkaiko hiriburura iristearen ondorioz linea geltokiarekin bat egiteko zailtasunak direla eta Abandoko geltoki berria eraikitzeko aurreikusitako epeak luzatzearen ondorioa da.
Ildo horretan, ETSk, Basurtu-Abando tarterako egiten ari zen Bilboko trenbide metropolitarraren 4. linearen eta hegoaldeko eremuaren eraikuntza-proiektuaren aldaketa ere lizitatu du.
