Ongizate, Gazteria eta Erronka Demografikoko sailburua Radio Euskadin elkarrizketatu dute. Melgosa sailburuak Estatuko gobernuari informazio gehiago eskatu dio azken horrek Gasteizen eraiki nahi duen errefuxiatuentzako zentroari buruz. «Gaur egun ezarri nahi duten ereduari buruz gutxi dakigu eta batez ere, eskainiko den harrerari buruzko datu gutxi dago. Badakigu hori ez zaigula gustatzen, eta behin baino gehiagotan errepikatu dugu «, adierazi du Nerea Melgosak.
18 eta 39 urte bitarteko pertsonei zuzendutako lehen etxebizitza erosteko abalen neurriaren inguruan, Melgosak azpimarratu du 3.000 etxebizitza mobilizatu nahi direla 2029. urtera arte. Sailburuak gaineratu du Euskadin kolektibo horrek erosketarekiko lehentasun handiagoa duela alokairuarekiko baino. Era berean, gazteei dagokienez, harrobia ondo eta duintasunez ordainduta zaindu behar dela defendatzen du. «Ezin dugu onatu neska-mutil horiek Euskaditik alde egitea soldata duinik ez dutelako», azpimarratu du Nerea Melgosak.
Inoren kargura ez dauden adingabe migratzaileen gaiari dagokionez, estatuko gobernuak Euskadi Kanarietan dauden ehunka gazteak hartu behar dituzten autonomia-erkidegoen zerrendatik kendu du. Euskadi eta Katalunia inoren kargura ez dauden adingabe etorkinen azken banaketatik kanpo geratu direnez, sailburuak Euskadik migrazio-politikan 20 urte daramatzan ondo egindako lana aipatu du. «Denoi gustatzen zaigu zorionak ematea edo lana ondo egiten ari garela esatea, edo gutxienez kontuan hartzea. Nik uste dut hori onargarria dela eta ondo dago aitortzea. Modu objektiboan ezagutu da» baieztatu du Melgosak.
Gai horiez gain, elkarrizketan SATEVI genero-indarkeriaren biktimentzako telefono bidezko arreta-zerbitzuaz eta gizarte-zerbitzuen sistema desburokratizatzeko helburuaz hitz egin da.
