Bilboko Ingeniarien Eskolan ospatu da Egurraren Jardunaldia, Baskegurrek antolatutako Euskadiko Egurraren XI. astearen barruan, Eusko Jaurlaritzako Ekonomia, Lan eta Enplegu Sailaren, Elikadura, Landa Garapena, Nekazaritza eta Arrantza Sailaren, Hazi Fundazioaren eta hiru foru aldundien babesarekin.
«Baso-zuraren balio-katean lan-ingurunea hobetzeko hausnarketa eta proposamena» lelopean, baso-sektoreko erakundeak, enpresak eta eragileak bildu ziren topaketan, laneko segurtasun eta osasuneko erronkei aurre egiteko.
Irekitze instituzionala Lourdes Íscar Osalaneko zuzendari nagusiak eta Iker Iglesias Eusko Jaurlaritzako Elikagaien Politika eta Industriako zuzendariak egin dute. Íscarrek azpimarratu du oso garrantzitsua dela Segurtasun eta Osasuneko Estrategia Sektoriala ezartzea elikaduraren eta zuraren balio-katean (Euskadipreben) sektore horien barruan, lan-baldintzak hobetzeko. Estrategia horren bidez, sentsibilizazio- eta prestakuntza-ekintzak egin dira, prebentzio-praktika seguruen gidak garatu dira, eta sektore jakin batzuetan ezbeharren aurkako talka-planak egin dira.
Ildo horretan, Osalanek, Lan Ikuskatzailetzarekin eta foru-aldundiekin lankidetzan, basogintza-sektoreko ezbeharren aurkako txoke-plana jarri du abian, sektore horretan hobetu beharreko prebentzio-neurriak berrikusi nahi dituena.
Osalaneko zuzendariak erakundeen arteko lankidetza-ereduaren garrantzia azpimarratu du, hiru foru-aldundiak sektore-estrategia honetan integratuta.
Jardunaldian, Osalaneko lehen sektoreko taldeko Jose Luis González eta Itxaso Paul ere parte hartu dute, bai eta zuzendariorde teknikoa Inés Álvarezek ere. Baso-sektorearen istripu-tasa aztertu dute, eta ezbeharren aurkako plan horretan jasotako neurriak zehaztu dituzte.
