- 25-29 urtekoen artean, ehunekoa erdia baino handiagoa da, eta % 54,1era iristen da.
- Gazteen % 14,9k boluntariotza-lanetan parte hartzen du gaur egun, serie historikoko ehunekorik handiena eta 2008ko bikoitza baino gehiago ( % 6,4).
- Gazteen Euskal Behatokiak 2.100 gazteri baino gehiagori egindako azterlanaren arabera, emakumeek gehiago parte hartzen dute haurrei eta gazteei zuzendutako jardueretan (% 53,4, gizonen % 42,5en aldean), eta gizonek ehuneko handiagoak dituzte kulturarekin eta kirolarekin lotutako boluntariotzari dagokionez (% 26,0 eta emakumeen % 18,4).
Joan den abenduaren 5ean Boluntariotzaren Nazioarteko Eguna zela eta, Eusko Jaurlaritzako Ongizate, Gazteria eta Erronka Demografiko Sailak «Gazteak eta boluntariotza. Euskadi 2025 » aurkeztu du, Gazteen Euskal Behatokiak egina.
Euskadin bizi diren 15 eta 29 urte bitarteko 2.149 gazteri 2025eko maiatza eta ekaina bitartean egindako inkestaren arabera, gazteen % 14,9k parte hartzen du gaur egun boluntariotza-lanetan, serie historikoaren ehunekorik handiena eta 2008ko ehunekoaren bikoitza baino gehiago (% 6,4).
«Gazteen Euskal Behatokiak emandako materialak gure gazteen inplikazio solidarioaren erradiografia oso argia eskaintzen du. Bereziki esanguratsua da gazteen ia erdiek boluntariotzan esperientzia izatea «, adierazi du Adrián López Sarachaga Gazteria eta Emantzipazio zuzendariak.
Gazteen ia erdiek boluntariotza egin dute
Gaur egun kolaboratzen dutenak eta bizitzako uneren batean kolaboratu dutenak kontuan hartuz gero, EAEko gazteen % 44,7k adierazi du boluntariotza-jardueretan parte hartu duela. 25-29 urtekoen artean, ehunekoa erdia baino handiagoa da, eta % 54,1era iristen da.
Emakume gazteek gizonek baino partaidetza handixeagoa dute: emakumeen %48,4k noizbait egin dute boluntariotza, eta gizonen % 41,3k.
Konpromiso egonkorra denboran zehar
Azterlanak agerian uzten du, halaber, lan horiek egiten dituztenen inplikazio-maila handia. Boluntariotzan esperientzia duten gazteen % 58,2k gutxienez hilean behin lagundu du, eta, talde horren barruan, % 37,9k astero. Dedikazioaren maiztasuna antzekoa da emakumeen eta gizonen artean.
Konpromiso iraunkor horrek bizikidetzaren, justizia sozialaren eta parte-hartze aktiboaren balioak indartzen laguntzen du, bai eta belaunaldien arteko elkartasuna sendotzen ere komunitate inklusibo baten baitan.
Jardun-eremuak: gizarte-ongizatea eta kultura-nortasuna
Euskadiko gazteek beren borondatezko ahalegina, batez ere, pertsonen ongizatearekin, kohesio komunitarioarekin eta komunitate inklusibo bat eraikitzearekin lotutako eremuetan kontzentratzen dute:
- Haurrak eta gazteak, ekintza-eremu nagusia, boluntario-lanetan esperientzia dutenen % 48,2k parte hartu baitu. Eremu hori bereziki garrantzitsua da emakume gazteen artean.
- Pobrezia, garapenerako lankidetza eta migratzaileei edo errefuxiatuei laguntzea, % 22,7ko parte-hartzearekin.
- Kultura, ondare artistikoa edo kulturala eta euskara: % 19,3.
- Ekologiak eta ingurumenak (% 15,7), adinekoek (% 13,6) eta desgaitasuna duten pertsonek (% 13,2) osatzen dituzte gazteen arteko lankidetza-eremu nagusiak.
Beste eremu batzuetan, hala nola osasunari eta adikzioei lotutako ekintzetan, larrialdietan edo animalien babesean, gazte boluntarioen % 10 baino gutxiago biltzen da. Oro har, boluntariotzan esperientzia duten hamar gaztetik lauk (% 40,8) eremu batean baino gehiagotan parte hartu dute, eta horrek agerian uzten du interesen aniztasuna eta konpromisoaren zabaltasuna.
Sexuaren araberako aldeei dagokienez, azterlanak nabarmentzen du emakumeek gehiago parte hartzen dutela haurrei eta gazteei zuzendutako jardueretan (% 53,4, gizonen %42,5en aldean), eta gizonek ehuneko handiagoak dituztela kulturarekin eta kirolarekin lotutako boluntariotzetan (% 26,0 eta emakumeen % 18,4).
«Ekintza boluntario bakoitza inbertsio bat da etorkizunean»
«Boluntariotza funtsezko zutabea da gizarte-kohesiorako eta gure komunitatea indartzeko. Konpromisoaren adierazpena da, balio partekatuak indartzen eta belaunaldien arteko elkartasunean eta aniztasunaren errespetuan oinarritutako komunitate inklusiboa eraikitzen laguntzen duena «, azpimarratu du Adrián López Sarachagak.
«Euskadin, gure gazteen ia erdiak pertsonen ongizatera eta gure kultura-nortasuna bultzatzera bideratutako ekimenetan parte hartu du. Datu horrek, bere inplikazioa ez ezik, justizian eta berdintasunean oinarritutako gizarte-eredu batean laguntzeko borondate irmoa ere islatzen du. Ekintza boluntario bakoitza inbertsio bat da etorkizunean. Horregatik, boluntariotza sustatzen eta babesten jarraitu behar dugu, gizarte indartsuago, kohesionatuago eta gizatiarrago baterantz aurrera egiteko tresna estrategiko gisa «, amaitu du.
