Estitxu Garaik, Bizkaiko Campuseko eta Komunikazioko errektoreordeak, Fernando Plazaolak, Zientzia eta Teknologia Fakultateko dekanoak, eta Aitor Bergarak, EHU Quantum Centerreko zuzendariak hitzarmena sinatu dute EHU Quantum Gela Zientzia eta Teknologia Fakultatean egokitzeko. Helburua da Bizkaiko Campusean gune erreferentzial bat finkatzea Euskal Herriko Unibertsitatearen Kuantikako berezko zentroarentzat.
EHU Quantum Centerraren jarduna oinarrizko ikerketan eta goi-mailako prestakuntzan oinarritzen da, baina arreta berezia jartzen du berrikuntzan eta enpresei zuzendutako aplikazioen garapenean. Estrategia honekin, Fisika Kuantikoaren potentziala bultzatu nahi da, zientzia-komunitatean eta gizartean inpaktu esanguratsua ziurtatuz. Bertan, ehun ikertzaile baino gehiago ari dira lanean: fisikariak, kimikariak, ingeniariak, eta matematikariak, hamar ikerketa talde kontsolidatu desberdinetan antolatuta.
Ekainean, Leioako campuseko Maria Goyri zentro zientifikoan egiten ari diren lanak amaitzean, eraikin horrek EHU Quantum Centerreko hainbat laborategi hartzea aurreikusten da, eta zentroaren behin betiko egoitza izango da.
