- Aurkezpenek, topaketa profesionalek eta aintzatespenek markatu dute Euskadiren bigarren jardunaldia FITUR 2026n.
FITUR 2026ren bigarren jardunaldia aurkezpen, topaketa profesional eta aintzatespenen agenda bizi batek markatu du Euskadiko standean, eta sektoreko lurralde, udalerri eta eragileak bildu ditu turismo-eskaintza jasangarri, berritzaile eta askotariko baten inguruan.
Goizean goizetik, Euskadiko standa turismoaren sektorerako topagune gisa finkatu da, eta hainbat ekimen hartu ditu, inklusioa, irisgarritasuna eta euskal turismo-eredua definitzen duten balioak ardatz dituztenak. Jardunaldiari hasiera emateko, Gasteiz turismo inklusibo eta irisgarriaren helmuga gisa aurkeztu da, pertsona guztientzako turismoarekin lurraldeak hartua duen konpromisoa indartuta.
Jarraian, “Euskadi Balioekin Bidaiatzen” gida aurkeztu da, jasangarritasunarekin, ingurunearekiko errespetuarekin eta tokiko biztanleekiko bizikidetzarekin bat datorren bidaia arduratsu bat sustatzera zuzendutako tresna. Ondoren, Araba eta Vitoria-Gasteizko Enbaxadoreak 2026 ekitaldiak balioan jarri du Euskadin eta kanpoan lurraldearen identitatea proiektatzen laguntzen duten pertsonen eta erakundeen zeregina.
Ondarean, berrikuntzan eta helmugen eraldaketan oinarritutako aurkezpenekin jarraitu du goizak. Irunek “Burdinatik berdera. Irugurutzetako labeak”, historia industriala eta ingurumenaren berreskuratzea batzen dituen proposamena; Uribek, berriz, digitalizazio turistikoaren eta adimen artifizialaren aldeko apustua egin du, bisitariaren esperientzia eta helmugaren kudeaketa hobetzeko tresna gisa. Identitateak eta hizkuntzak ere leku nabarmena izan dute “Ongi etorri euskararen herrira, ongi etorri Urola Kostara” aurkezpenarekin, bai eta Aiaraldeko Bideen sustapenarekin ere, naturako eta hurbileko turismoari lotuta.
Eguerdian, Euskadiren Kanpoko Bulegoetako zuzendarien urteko topaketa hartu du standak, nazioarteko turismo-sustapenaren arloko koordinazioa indartzea helburu. Agendak turismo aktiboari eta naturari lotutako proposamenekin jarraitu du, besteak beste: Gorbeia Cycling, Arabako Mendialdeko asfalto naturaleko ibilbideak, eta Euskal Kostaldeko UNESCO Geoparkearen tour birtuala, lurraldea publiko berriei hurbiltzeko teknologiak duen potentziala erakutsi duena.
Jasangarritasuna izan da arratsaldeko ardatz nagusietako bat, Arabako Errioxako Jasangarritasun Planaren aurkezpenarekin, baita Surfaren Herrien Sarearekin ere, kirola, kultura eta itsasertza ikuspegi arduratsu batetik lotzen dituen ekimena.
Jardunaldiaren une nabarmenetako bat Helmuga Turistiko Adimendunen sarien ekitaldia izan da, Segitturrek bultzatua, euskal helmugek berrikuntzarekin, gobernantzarekin eta jasangarritasunarekin duten konpromisoa aintzatesteko. Aldi berean, Guardiak “Laguardia en vino” proposamena aurkeztu du, enoturismoa balioan jartzen duena tokiko garapenaren elementu identitario eta traktore gisa.
Jardunaldia amaitzeko, Best Pintxos–Miniature gida aurkeztu da. Gida horrek gastronomia indartzen du, Euskadiko erakargarri turistiko nagusietako bat baita, eta nazioartean aitortutako identitate-ikurra.
Bigarren jardunaldi honekin, Euskadik lurraldeen balioetan, berrikuntzan, jasangarritasunean eta protagonismoan oinarritutako turismo-eredua indartzen jarraitu du FITUR 2026n, eta sektorearentzako erreferentzia-gune gisa sendotu du bere standa, bai eta askotariko eta kalitatezko eskaintza sustatzeko ere.
