Ekimena ‘Arduratu’ kanpainaren parte da, eta herritarrak animatzen ditu hondakinen kudeaketaz arduratzeko
Donostiako Udalak aste honetatik aurrera sentsibilizazio-kanpaina berri bat jarri du abian, sortzen ditugun hondakinen kudeaketaz, minimizazioaz eta berreskurapenaz arduratzeko deia eginez. ‘Arduratu’ lelopean, ekimenak herritarren parte-hartze handiagoa lortzea nahi du zaborren gaikako bilketan, zatiki organikoko edukiontzia erabiliz.
Hori lortzeko, hainbat ekimen jarriko dira abian. Nagusia bulego mugikor bat sortzea da, donostiarrek Joko Garbia programan izena emateko aukera izan dezaten, bilketa organikorako edukiontzia erabiltzeko eta etxean hondakin horiek bereizteko kuboa eta poltsak lortzeko.
«Gaur egun 13.000 etxebizitza daude programa honetan parte hartzen dituztenak, baina askoz gehiago izatea lortu nahi dugu», adierazi du Carlos García Hiri Mantentze eta Zerbitzuetako zinegotziak. Azaldu duenez, «bulego mugikor hori hiriko auzo ezberdinetan egongo da, jendeak jakin dezan bosgarren edukiontzi horrek existitzen dela, zer onura dituen ingurumenerako haren erabilerak, eta zer abantaila dituen. Adibidez, zaborren tasan hobaria izateko aukera».
Inskripzioa egin bezain laster, bizilagunek edukiontzi horiek irekitzeko txartela jasoko dute, baita hondakin organikoa behar bezala sailkatzeko poltsa konpostagarriak ere.
Bulegoaren kokapena
Bulegoa puntu hauetan egongo da:
- 05/05-05/12: Larratxo (plaza) – Altza
- 05/28-06/14: Julio Caro Baroja plaza – Antiguo
- 06/18-06/28: Sagastieder plaza – Intxaurrondo
Astelehenetik larunbatera irekita egongo da, 9:30etatik 13:30era eta 16:30etatik 19:30era.
Bulegoan informatzaile bat ere egongo da, mota guztietako hondakinen sailkapenari eta birziklapenari buruzko edozein zalantza argitzeko.
Beste ekimenak
Kanpaina ekainaren 30era arte egongo da martxan, eta Dbusen eta autobus-geltokietako markesinetan ere zabalduko da. Horrez gain, triptiko bat postontzietan banatuko da, eta ostalaritzan hainbat ekintza egingo dira, organikoaren gaikako bilketan parte hartzeko.
