100.000 euro baino gehiago inbertitu dira azaleraren % 80an baino gehiagoan zeuden kalteak konpontzen
Donostiako Udalak konpondu eta garbitu ditu azken asteetan izan diren ekintza bandalikoen ondorioz kalte larriak zeuzkaten Urgull mendiko informazio-plakak. Esku-hartzeak 6.000 euroko kostua ekarri dio Udalari. Udaberrian, 65 informazio-seinale jarri ziren Urgull mendiaren interpretazio-ibilbidean, horietatik 34 noranzkoa adieraztekoak, eta 100.000 eurotik gorako inbertsioa egin zen horretan. Panel horiek, bisitariari historiaren, aberastasun botanikoaren, faunaren eta mendiko paisaiaren berri emateko diseinatuak, kalteak izan dituzte azaleraren % 80an baino gehiagoan; besteak beste, arrastoak eta grafitiak egin zizkieten batzuei, tokitik atera zituzten beste batzuk, bai eta hautsi ere beste zenbait.
Beraz, Udalak:
- hondatuta zeuden euskarriak kendu eta garbitu ditu
- berriro jarri ditu puskatutako edo desagertutako panelak
- ainguraketa mekanikoak hobetu ditu berriz ateratzen saiatzen badira ere hobeto eutsi diezaioten
- bandalismoaren aurkako tratamendu bat aplikatu die kanpoko geruzan, aurreratzean lehengoratze-lanak errazagoak izan daitezen
Carlos García Hiri Mantentze eta Zerbitzuetako zinegotziak irmo kondenatu ditu gertakari hauek: «Ekintza bandalikoak dira, ondare publikoa hondatzen dutenak eta inolako justifikaziorik ez dutenak. Hiriari kostu ekonomiko bat eragiteaz gain, hiri-paisaiaren parte diren espazioak hondatzen dituzte, guztionak diren eta egunero erabiltzen diren espazioak».
Garcíak azpimarratu duenez, Udalak «eraso horietako bakoitza salatzen eta kalteak konpontzeko azkar jarduten jarraitzen du. Baina errespetu kolektiboa eta herritarren erantzukizuna ere eskatu behar dira. Denoi dagokigu denona dena zaintzea».
Udalak gogorarazi du horrelako erasoei aurre egingo dietela eta jarraipen estuagoa egingo dutela eremu sentikorretan, bereziki ondare edo sinbolismo aldetik balio handia duten espazioetan. Udalak espazio publikoak mantentzeko duen konpromisoaren barruan, ez bakarrik sartzen da kalteak konpontzea, baizik eta baita prebentzioa eta sentsibilizazioa ere.
