Maiatzaren 15etik 23ra ospatuko da, Elkarrizketa eta Garapenerako Kultur Aniztasunaren Nazioarteko Egunarekin bat eginez
Kulturen Arteko Astea maiatzean itzuliko da, eta aurtengo edizioa zabalagoa, irekiagoa eta parte-hartzaileagoa izango da. Lehen edizioak harrera ona izan zuenez, Udalak kultura-aniztasunaren inguruko erreferente gisa eta hiriak bizikidetzarekin eta inklusioarekin duen konpromisoa indartzeko topagune gisa finkatu du hitzordu hori.
Programazio nagusia maiatzaren 15etik 23ra bitartean egingo da, Elkarrizketarako eta Garapenerako Kultura Aniztasunaren Munduko Egunean. Hala ere, jarduera batzuk, batez ere erakusketak eta dibulgazio-proposamenak, hilabete osoan zehar luzatuko dira, auzo, espazio eta publiko zabalagoetara iristeko.
Aste horietan, Donostiak programa indartu bat izango du: bertan, erakusketak, kontzertuak, topaketak, proiekzioak, tailerrak eta proposamen gastronomikoak izango dira. Horien bidez, herritarrei gonbitea luzatu nahi zaie, hirian elkarrekin bizi diren kultura anitzen aberastasunaz gozatzeko, bai eta horiek partekatu eta deskubritzeko ere.
Aniztasuneko zinegotzi Iñigo García Villanuevak nabarmendu duenez, “lehenengo edizioa arrakastatsua izan zenez, aurten beste urrats bat eman nahi izan dugu, Kulturen Arteko Aste anbiziotsuago, irekiago eta parte-hartzaileago bat antolatu baitugu. Ekimen hau kulturen arteko topagune erreal gisa finkatzen jarraitu nahi dugu, herritarrek aukera izan dezaten elkar ezagutzeko, esperientziak partekatzeko eta bizikidetza eraikitzeko, betiere elkarrekiko errespetua eta aitorpena oinarritzat hartuta». Zinegotziak bereziki eskertu nahi izan du elkarteen lana: “Benetako protagonistak haiek dira. Haien inplikazioa eta konpromisoa funtsezkoak dira hiri kohesionatuagoa, bidezkoagoa eta pluralagoa eraikitzeko”.
Lankidetza eta partaide berriak
Kultura Aniztasuneko Zinegotzigoak bultzatutako ekimen honek hiriko elkarteek urte osoan zehar egiten duten lana biltzen du. Aurtengo edizioan hogei erakunde inguruk hartuko dute parte: beren esperientzia eta sustraitze komunitarioa eskainiko dituzte, Donostiako gizarte-errealitatearekin konektatutako programazio askotarikoari forma emateko.
Berritasun gisa, Kulturako Foru Saila ere parte hartuko du aurtengo edizioan, proiektua indartzeko eta bizikidetzarako espazio partekatu gisa finkatzen laguntzeko. Goizane Álvarez Kulturako foru diputatuak adierazi duenez, “kultura funtsezko tresna da pertsonen eta errealitate desberdinen arteko zubiak eraikitzeko. Kulturen Arteko Astea gisako ekimenek aukera ematen dute aberastasun hori ikusarazteko eta gizarte-kohesioa indartzen duten espazioak sortzeko”.
Jarduera aipagarrienak
Proposamen garrantzitsuenen artean:
- Paula Arbide argazkilariaren “40 salto” erakusketa dago. Gaurtik aurrera eta hilabete osoan zehar EHUko Carlos Santamaria zentroko Txillardegi aretoan egongo da ikusgai. Erakusketak saltoaren metafora erabiltzen du migratu eta beste nonbait hutsetik hasi behar izan duten pertsonak ikusarazteko.
- Maiatzaren 15etik 30era, Garbera merkataritza-gunean beste erakusketa bat egongo da ikusgai, Donostian aniztasuna nola adierazten eta banatzen den ezagutzeko aukera emango duena.
- Programazioan kulturen arteko zuzeneko topaketarako ekimenak ere ageri dira, besteak beste, Cebanc lanbide-heziketako ikastetxearekin batera antolatutako kulturarteko bazkaria, esperientzia partekatu bat oinarritzat hartuta, gastronomia eta tradizio desberdinetara hurbiltzeko aukera bat.
- Aamaierako kontzertu bat antolatuko da Intxaurrondon maiatzaren 23an. Kontzertu horretan hainbat musika-emanaldi egingo dira, hiriko kultura-aniztasunaren isla.
Hiri kohesionatu eta irekia
Kulturen Arteko Asteak kulturen arteko elkar ulertzea, errespetua eta aintzatespena sustatzeko bokazioari eusten dio, eta elkartzeko, ikasteko eta parte hartzeko gune errealak sortzen ditu. Diskurtso polarizatzaileek markatutako testuinguru global batean, Donostiak aniztasunaren aldeko apustua berresten du, aniztasuna aberastasun kolektibo gisa ulertuta, bai eta kulturarteko elkarrizketaren alde, gizarte-kohesiorako funtsezko tresna gisa ere.
Iñigo García Villanueva zinegotziak dei bat egin die herritarrei: “Herritar guztiei gonbitea luzatzen diegu Kulturen Arteko Astean parte hartu eta ekimen hori bizitzeko. Aukera paregabea da elkar hobeto ezagutzeko, partekatzeko eta inguratzen gaituen eta hiri gisa egunero aberasten gaituen aniztasuna deskubritzeko”.
