- Ekonomia, Lan eta Enplegu sailburuak kooperatiba eta lan sozietateentzako laguntzen ezohiko agindu bat iragarri du, “balizko inpaktu ekonomikoei” aurre egiteko, betiere Eusko Jaurlaritzaren «industria ezkutuaren» esparruan
Mikel Torres Lehendakariordeak eta Ekonomia, Lan eta Enplegu sailburuak ekonomia sozialaren zeregin estrategikoa aldarrikatu du ostiral honetan Hernanin, eta helburu “handinahia eta argia” jarri du: 2040an sektore hori enpleguaren % 20 izango den Euskadirantz aurrera egitea. “Ez da zifra bat bakarrik. Herri baten ikuspegia da. Esan nahi du egonkortasun handiagoa, erresilientzia handiagoa, partehartze handiagoa, gizarte kohesio handiagoa eta balio partekatuetatik krisiari aurre egiteko gaitasun handiagoa izatea”, ziurtatu du.
ASLEren Batzar Nagusiaren itxiera ekitaldian, Torresek azpimarratu duenez, “gizarte ekonomiaz ari garenean ez gara ari soilik formula juridiko edo enpresarial bati buruz. Enpresa ulertzeko modu batez ari gara, pertsonak erdigunean jartzen dituen eredu bati buruz”.
Ziurgabetasunak, tentsio komertzialek eta gerraren eraginak markatutako nazioarteko testuinguru batean, Lehendakariordeak gogorarazi du Eusko Jaurlaritzak “ezkutu industriala” delakoa onartu zuela: 1.000 milioi euro baino gehiago mobilizatzen dituen erantzun integrala, produkzio sarea, enplegua eta jarduera ekonomikoa babesteko.
Testuinguru horretan, Torresek iragarri du berak zuzentzen duen saila izapideak amaitzen ari dela kooperatibei eta lan sozietateei bereziki zuzendutako laguntzen ezohiko agindu bat abian jartzeko, egungo egoerak izan ditzakeen “inpaktu ekonomikoei aurre egiten” laguntzeko. Ekonomia, Lan eta Enpleguko sailburuak aurreratu duenez, izapideak amaitu ondoren, sektorearekin “batera” egingo dute lan neurriak diseinatzen eta ezartzen.
“Urte hauetan zerbait ikasi badugu da erantzun onenak lankidetzatik datozela”, baieztatu du Torresek. Ildo horretan, ASLEk gizarte ekonomiaren funtsezko eragile gisa egiten duen lana balioetsi du, eta azpimarratu du Ekonomia, Lan eta Enplegu Sailarekin duen lankidetza “estua eta leiala”, Euskadiren garapen ekonomiko eta sozialera bideratutako proiektu eta ekimen partekatuetan gauzatzen dena.
Ekitaldiari amaiera emateko, aitortutako enpresei sariak eman zaizkie: Aldika Productos Selectos, Abrasivos Texajax eta Matemas akademia. Torresek adierazi duenez, enpresa horiek dira elikaduraren, industriaren eta hezkuntzaren sektoreetan lan sozietateen ereduak duen sendotasunaren eta aniztasunaren adibide.
