Bizkaiak 35 eurora jaitsi du 2027ko urtarrilaren 1etik aurrera lurraldeko ordainpeko bideetatik ibiltzeagatik ordaindu beharreko hileko gehieneko zenbatekoa

Bizkaiko Foru Aldundiak Bidesaria programa eguneratuta 2027rako lurraldeko autobideen tarifei buruzko Foru Dekretu berria amaitu du. Programa honek lurraldean bizi diren eta Bizkaiko eta gainerako euskal lurraldeetatik (AP-68, AP-8, AP-1, MHS eta Artxandako tunelak) zirkulatzen duten gidarientzako hileko gastuaren mugak ezartzen ditu.

Hurrengo urterako dekretuaren berrikuntza nagusia gehieneko zenbatekoak 5 euro jaistea izango da. Horrela hilean 35 euroko muga ezarriko da bakarrik Bizkaian egiten diren joan-etorrietarako, eta 53 euro gehiago ibilbideak Gipuzkoan AP-8tik edo Araban AP-68tik jarraitzen badu.

Gainera dekretu berriak, indarrean 2027ko urtarrilaren 1ean sartuko denak, beste aldaketa bat ere jasoko du: beste euskal lurraldeetatik egindako joan-etorrietan egindako ordainketak metatuta zenbatuko dira. Horrela lurralde baterantz edo besterantz zirkulatzen duten gidariek 88 euroko muga ordainduko dute (lehen 194,30 euro), eta ordainketa horretatik aurrera hiru lurraldeetan ibili ahal izango dira doan, hilean gehienez 150 bidaia  egin arteko mugarekin.

«Bidesaria programa KPIren igoera aplikatuz eguneratu beharrean, gure ordainpeko bideetatik maiz ibili behar duten pertsonei laguntzeko ahalegina egingo dugu. Mugak 5 euro jaitsi ditugu, bai Bizkaian, bai Araba eta Gipuzkoarako joan-etorrietan. Eta dirulaguntzen bi dekretutatik, autobide bakoitzeko bat izatetik bakarra izatera igaro gara; horrela igarotze guztiak batuko dira, Gipuzkoan edo Araban egiten diren kontuan hartu gabe», zehaztu du Carlos Alzagak, Azpiegituretarako eta Lurralde Garapenerako foru diputatuak.

Alzagak gogorarazi duenez «Bizkaiko Foru Aldundiak 11 milioi euro bideratzen ditu urtero bidesarien ohiko erabiltzaileentzako hobari-programara eta gaur egun 29.000 gidari inguruk jasotzen dute onura hori».

Gastu-mugaren araberako dirulaguntzen programan sartzeko izena eman behar da Bidesarian (Interbiak): Bidesarietarako eta errepideen erabilerarako diru-laguntzak. – Interbiak

AP-68 autobidea ereduan sartzea

Aldi berean, Bizkaiko Foru Aldundia AP-68 autobideko bidesaria arautuko duen Foru Dekretua lantzen ari da, azaroaren 11tik aurrera Bizkaiko tartea foru-kudeaketaren ereduaren barruan sartuko baita. Arau honek, hala ere, bi hilabeteko aldi baterako indarraldia izango du; izan ere, datorren urtean AP-68 autobidea 2027ko bidesariei buruzko Foru Dekretuak arautuko du, Bizkaiko ordainpeko bide guztietarako komuna denak.

AP-68 autobidearen Bizkaiko zatiko 22,3 kilometroak Foru Aldundiaren errepide sarean sartzeko geratzen zen azken tartea dira. Eta tarte horren titulartasuna Bizkaiko Foru Aldundiarena den arren 2020ko urtarrilaren 1etik tarte horren ustiapenak, indarrean dagoen estatu-emakidarekin bat, Avasa enpresa emakidadunaren esku jarraitu du.

Azaroaren 11tik aurrera egoera aldatu egingo da. Eta une hori iristen denean Bizkaiak ibilgailu arinei zein astunei batez beste % 20ko murrizketa aplikatzea erabaki du.

Garraio astunaren kasuan komeni da gogoraraztea hobari guztiak metagarriak direla eta bidesarietan % 70erainoko deskontuak lortzeko aukera ematen dutela. Alde batetik salgaien errepideko ibilgailuek % 13ko beherapena jaso dezakete maiztasunagatik, betiere AP-8tik, Metropoliaren Hegoaldeko Saihesbidetik eta AP-68tik 20 ibilbide konbinatu edo gehiago egiten badituzte. Laguntza horri ibilgailu eraginkorretarako hobariak gehitu behar zaizkio, motor-teknologiaren arabera % 15, % 20 eta % 25 artekoak izan daitezkeenak, bai eta CO₂ emisio txikietarako laguntzak ere, % 5 eta % 50 arteko murrizketekin.  Neurri hauek mugikortasun jasangarriagoa eta ingurumenarekiko begirunetsuagoa bultzatzen dute, foru-kudeaketako autobideetan lehendik aplikatzen zirenak eta orain AP-68an txertatzen direnak.

Kontserbazio, mantentze eta ustiapen zerbitzuaren lizitazioa

Interbiak foru-sozietatea Azpiegituretarako eta Lurralde Garapenerako Sailari atxikita dago eta Bizkaiko ordainpeko bideak kudeatzeaz arduratzen da, lurraldeko ordainpeko autobideen zuzendaritza, ikuskapen eta ustiapenaren kontrola barne. Testuinguru honetan hilabete honetan Interbiakek lizitaziora atera du AP-68 autobidearen Bizkaiko zatia kontserbatzeko, mantentzeko eta ustiatzeko zerbitzua; kontratu honek bost urteko iraupena izango du eta 81 milioi euroko aurrekontua du.

Foru diputatuak gogorarazi duenez, Bizkaiko Foru Aldundiak «urtero 1,8 milioi euro inguru inbertitzen ditu gidarientzako laguntzetan autobide horretako bidesarietatik diru-sarrera bakarra ere jaso gabe». Eta berehala erantzun beharreko beharrei buruz hitz egin du: «Azaroaren 11a benetako mugarria izango da Bizkaiko bidesarien kudeaketan, gure ereduan AP-68 autobidea txertatzen delako. Baina onarpen honek Bizkaiko foru sareko estandarretara eta indarrean dagoen araudira eta segurtasunaren arloko hainbat alderdiri dagokienez egokitzeko inbertsio handia ere badakar berekin».

Ildo horretatik Alzagak azaldu du lizitazioaren agirian datozen bost urteetan 15 milioi euroko inbertsioa egitea aurreikusten dela, eta horietatik 12,5 milioi ezpondak, zoruak eta zoladurak, egiturak, euste-sistemak, seinaleak, garraio-sistema adimendunak (ITS), instalazio elektrikoak eta azpiegiturako beste elementu batzuk hobetzeko eta kontserbatzeko erabiliko direla. Gainerako 2,5 milioiak jasangarritasuna indartzera, teknologia berriak sartzera eta erabiltzaileen esperientzia eta arreta hobetzera bideratutako berrikuntza-proiektuetan inbertituko dira.

Azpiegituretarako eta Lurralde Garapenerako foru diputatuak azpiegitura berriaren mantentze-lanen urteko kostua ere kuantifikatu du. «Urtean 12 milioi euro baino gehiago izango dira», esan du amaitzeko Alzagak.