Osakidetzak Boluetako osasun-zentro berriaren lizitazio-espedientea argitaratu du, eta, lizitazioa hasten denetik aurrera, obrak 30 hilabete inguruko exekuzio-epea izango du. Zentroa 917 metro koadroko lursail batean eraikiko da, San Joaquín eta Sagarminaga kaleen elkargunean, eta egungoa ordeztuko du. Sagarminaga kaleko 56. zenbakiko beheko solairuan dagoen zentroa txiki geratu da estaldura sanitarioa emateko ia 10.000 pertsonako biztanleriari, hurrengo urteetan hazten jarraituko dena, gainera, eremuaren hirigintza-garapenaren ondorioz.
Osakidetzak osasun-zentro berri hau eraikiko du azken urteetan biztanleria-hazkunde nabarmena izan duen Boluetako auzoan. Osasun-zentro modernoagoa izango da, eta Bilboko auzo honek eskatzen dituen behar asistentzialei aurre egiteko gaitasun handiagoa izango du. Eusko Jaurlaritzako Osasun Sailarentzat, Lehen Mailako Arretan inbertitzen jarraitzea eta azpiegitura sanitarioak hobetzea lehentasuna da, pazienteei egunero eskaintzen zaien kalitateari eutsi ahal izateko. Zentro berriak sei solairu izango ditu, zeinetan zerbitzu berriak eskainiko baitira, hala nola Pediatriako eta erditzeko prestaketarako eremu esklusiboa. Inbertsioa 9,1 milioi eurokoa izango da.
Osasun-zentro berriak egungoa baino hiru aldiz handiagoa den azalera erabilgarria izango du, eta horrek ahalbidetuko du kontsulta eta zerbitzu gehiago barne hartzea. Sei solairuko eraikina izango denez, Familiako Medikuntzako, Pediatriako eta Erizaintzako kontsulta gehiago ireki ahalko dira, eta, bestalde, beste baliabide batzuk ere eskaini ahalko dira, hala nola Pediatriako eta erditzeko prestaketarako gune esklusiboa. Zehazki, eremu horrek Pediatriako 4 kontsulta, Pediatriako Erizaintzako 4 kontsulta eta Emaginaren kontsulta bat izango ditu, erditzeko prestaketarako gelaz gain.Gainera, osasun-zentro berriak itxarongela zabalagoak eta argitsuagoak izango ditu, bai eta profesionalak erosoago egoteko zerbitzuak ere, besteak beste: bilera-gelak, aldagelak eta egongelak.
Osasun-zentro berrirako aurreikusitako inbertsioa 9,1 milioi eurokoa da, eta aerotermia bidezko ekoizpen termikoko sistemak eta panel fotovoltaikoetan oinarritutako energia-ekoizpen sistemak izango ditu; beraz, energia-kontsumoa ia nulua izango da.
