Goizean zehar, 70 ikasle inguruk beraiek sortutako erakusketa bat antolatu dute, kontsumo-ohiturei buruzko kontzientziazioa eta hausnarketa kritikoa sustatzeko
Maiatzaren 5etik aurrera, Barakaldoko Clara Campoamor Zentro Zibikoan ikusgai egongo da herriko hainbat ikastetxeetako ikasleek egindako lanak biltzen dituen erakusketa, Eskolako Agenda 2030 programaren baitan, Eusko Jaurlaritzaren laguntzarekin garatua.
Erakusketa hau aurreko ikasturteko Eskolako Foroan ikasleek adostutako ekintza eraldatzailearen emaitza da. Ekintza honen bidez, sentsibilizazio-kanpaina bat garatu da kontsumo arduratsua sustatzeko, elikagaien xahuketa murrizteko eta ingurumenaren zaintza indartzeko helburuarekin.
Ikasturtean zehar, parte hartu duten ikastetxeetako ikasleek hainbat material landu dituzte — kartelak, bideoak eta bestelako baliabide grafikoak—, herritarrengan ingurumenarekiko kontzientziazioa sustatzeko eta eguneroko kontsumo ohituren inguruko gogoeta bultzatzeko asmoz.
Clara Campoamor Zentro Zibikoan antolatutako erakusketak aukera emango du ikastetxe ezberdinek egindako lana modu bateratuan aurkezteko, proiektuaren izaera kolaboratiboa indartuz eta herritarrei ikasleen proposamenak eta mezuak ezagutzeko aukera eskainiz.
Ekimen honen bidez, ikasleak udalerriko bizitza sozialean eta ingurumenaren zaintzan aktiboki inplikatzen dira, eta garapen jasangarriaren aldeko eragile bihurtzen dira.
Barakaldoko Udalak herritar guztiak gonbidatzen ditu erakusketa bisitatzera eta kontsumo arduratsuago eta jasangarriago baten aldeko gogoeta egitera.
